مؤمن المحمدي يكتب: يمكن يكون بـ الظبط
بـ الظبط
أو يمكن مش بـ الظبط
أو يمكن صوت الخبط على الباب ما بقاش بـ يهم
ما دام مش فارق مين الجاى
وأنا مش نساى
هو بس ساعات الخيط بـ يكر
وبـ يتعقد ويجر حاجات بـ تجر حاجات
بـ تجر سنين بـ تخر
وما تبقاش عارف هى المسافات تتقاس إزاى؟
أنا مش فاكر اسمِك
مش فاكره
لكن فاكر
لما النيل خد كفك وفردها، وكرمش لك فيها كام لحظة حلوين
وقال لك: صريهم وداريهم
واوعى تخافى!
وافتكرى إن الخوف خواف م اللى بـ يقدر يختار
واللى تطاوعه الأسرار
واللى ما تفرقش معاه الجنة من النار
أنا مش فاكر اسمِك
مش فاكره
لكن فاكرِك
إنتى اللى رسمتى دايرة حواليها الدهشة تطوف
إنتى المعنى اللى ما تنقلهوش كلمات وحروف
وإنتى اللى لما بـ تشوف، بـ تشوف
إنتى إنتي
بـ أقول لك إيه
سيبك من القافية وم الوزن
وتعالى هـ آخدك مشوار
جايز يطوّل شوية ومحتاج صبر كتير
ومالوش هدف
يزهّق؟
ما يزهقش غير الضعفا
أنا عارف إن الضعف جميل
أجمل سنين عمرنا ما عشنهاش
أجمل سنين عمرنا
لما كنا رضع
بـ يشيلونا
وما يستحملوش بكانا
فـ يراضونا بـ أى طريقة
ويهتشكونا
ويخافوا علينا من الهوا الطاير
أجمل سنين عمرنا
لما كان مش محسوب علينا خطايا ولا أخطاء
ومش منتظر مننا أى حاجة غير ابتسامة
أجمل سنين عمرنا
لما كنا الأمل فى عالم الخيبات
لما كنا بكرة لـ اللى اتخصم من رصيدهم سنين كتير
أجمل سنين عمرنا
لما كنا كل دا وأكتر
لـ إننا ما كناش قادرين
أيون
الضعف جميل أنا عارف
أو يمكن «جميل» مش دقيقة
الضعف مريح
بس القوة أمان
مشوارنا محتاج قوة
ما داهية لـ تكونى فاكرة إنى عارف المشوار!
تؤ
إحنا هـ ناخد بعض وخلاص
تعالى مثلا نتعلم القسمة
«المشاعر الإيجابية تتقسم على اتنين تزيد»
«المشاعر السلبية تتقسم على اتنين تقل»
مالكيش فى الحساب؟
نرجع لـ الوزن
تُسلّمنا الليالى لليالي
فلا هَمٌّ يدوم ولا ابتهاجُ
شآبيبُ العيونِ تفيض حزنًا
كذا الأفراحُ؛ إن مسَّتْك، هاجوا
مش لـ الدرجة دى!
ماشى
بس ما دام عدينا ع النحوى
مش غريبة إنه إنت وهى فى المضارع ليهم نفس التصريف؟!
إنت بـ تفرح
هى بـ تفرح
إنت بـ تحزن
هى بـ تحزن
إنت بـ تشرب قهوة
هى بـ تشرب قهوة
إنت بـ تعرف توزن
هى بـ تعرف توزن
إنت مش بـ تحب تستنى
هى مش بـ تحب تستنى
إنت بـ ترسم صورة لـ حاجات مالهاش شكل
هى بـ ترسم صورة لـ حاجات مالهاش شكل
إنت أنا
وهى كمان أنا
لسه مصمم تعرف إيه هـ يبقى فى الذاكرة
وإيه هـ يروح؟
لسه مصمم تعرف إيه اللى هـ يبقى عمومًا؟
لسه مصمم تعرف إن كان بـ الظبط أو مش بـ الظبط؟
