محمد حسنى إبراهيم يكتب: لاتيه

وقفت هنا

وقالت له عايزه قهوتى.. وتكون لاتيه

شاور بروحه من بعيد

من غير ما يسألها سؤال؟

إزاى وليه...؟

سرحت ف كونه المبتدا

والمنتهى

بينهم كتير من كام وجع

من كام سكات

بينهم ركام الذكريات

حطت ورودها ع اللى راح

شالت ورودها م اللى جاى

قهوة لاتيه ومعاها شاى

يستر معاه الوقت ويعدى ف سلام

قبل إما يرجع للورى

يخبط ف كام ذكرى ويبكى ودمعته

كأن الحب متخبى ف ورقة توت

بيستر عورته بيها

تقوله انسى

وصُب الشاى

يصب وصوته بيقطع

وبكل ضعف يدارى فيه

وقفت هنا

وقالت له عايزه قهوتى..

وتكون لاتيه.