هناء الوصيف تكتب: السر ف الرَّقوَة

وعنِّى قُول.. ولجل القوُل يكون مُنْصِف

بليز مش شرط تتعرف على الحاضرين من القارات 

وهاااى أهلين عَشر مرات 

وبتسلِّم وعلِّى الياقة فوق أكتر 

ونادى لـ مصر تتبخَّر ما دام عنى هتتكلم 

مسَلِّم قلبى ليك سطوَة 

فَمِد إيديك مع الخطوة لنتعانق

فيتسابق ندَى يومى اللى زاد شلَّال

يحمِّى ف هَم عن سابق ويحيِى آمال ويرقـينى 

على راسى وحوالينى «تبارك والفلق والناس»

يا ناسى السر ف الرَّقوَة 

عينيك حتمًا لتستقوَى 

وتسرق ف الخُطَا ضِلِّى

أوام من روحى فُوت خُدنى 

وحاكِى الخلق عن حُضنى اللى داب من وصلك الدامى 

وعن بركان بيشعل روسيا والشيشان

ف مشوار الدخول مِيت عام من العُزلة 

ما بين شَعرى وأقدامى 

وعن جِنِّيَّه بتراودك 

ف نُص الليل بجفنى الحُر لمَّا يمِيل 

تسايس ضهرك الهَوْدَج يِنخِّلها 

فتتمرجح حلاوة الروح غُنا وتواشيح 

وقبل الفجر ما يخبَّط تكِبَّك رِيح جدايلها 

فتتلخبط تتُوه مِنى 

وعن بلقيس.. 

إذا رَخَّت عيونى الغِيث 

فتكشف ساقها للتجديف فـ أسرارى 

وتبْحِر جُعبتى لُجَّه

وقبل شروعها ف الخَارجه؛ تكفَّر كل أوزارى 

وتعرف من محيط فهمَك إذا آن الأوان دهمَك 

فتسكن ف المحيط أوجاع 

وتقرا ف عينك الفنجان كتاب من ألف ليلة ويوم 

عن الأشواق؛ يخفف حِمل أسفارى 

وتفتح صفحة المندل على صدرك 

عشان تعرف مدَى زمزم

بِـشوط تعدادُه سبعة عجاف 

ما بين صفْوَك وبين مرْوَك 

فتتفجر عيون موسَى جَدَا ثغرك 

فتغرق ف الغرام بلقيس وتطفو ضد إبحارى 

بحالى جَدِّ فيه فَوْضَى بِباقة ورد اوركيدا.