مصطفى منصور يكتب: عصفور كناريا وحيد

الطفل اللى بيحبى فى عينى

مش عايز يكبر خالص

عمال يلعب ويلخبط ورقى

البنت حبيبتى المولودة فى نفس البرج

بتهمش كل التواريخ..

واصحى من النوم

ألاقينى مكسر كل عقارب ساعتى

ومكسر كل إزاز بيدارى النور عن عينى

والخوف شبابيك مقفولة

لو يوم اتفتحت هارتاح

النخلة الطالعة ف أرض الروح

بتسلم كل البلح اللى رميته 

بحجارتى للنتاش

والنجم اللى اتعودت عليه

ألقاه متبعتر على سقف البيت

كان متشرد تشريدة روح 

زهقت م التوابيت

مليت م الحواديت النعسانة

تحت لحاف الليل الخوف

والشوف اتبعتر 

على ترابيزة عمرك فاظة ورد

وكاس مايل احتج

مش شايف إنك خرفت

طب راهن عشك على غشك

يا حمار عصفورك طار.. محتار

لسه ماتعودشى على الحرية

لسه ف دمه غباوة قفصه

إحساسه بيأسه

فضها سيرة واخرج من حالتك دى

شيل النضارة السودا وغنى وارقص

رقصة طلوعك من بيبان الشرنقة

عللى صوت التريقة ع الهموووم.