عبدالمنعم الحريرى يكتب: الطريق
يا طريق يا أبووش أسفلت
لو نزلت دمعة عينى عليك كنت اتشققت
لو تعرف إيه واخد منى
أنا كنت صعبت عليك دلوقت
انت اللى غويت القلب الخام
وفتحت لى سكة على الأحلام
خلتنى مشيت
ورمتنى فريسة للأيام من يوم ما بدأت
حواديتك كانت ليل ونهار
بتهون على قلبى المشوار
وتنور لى فى ليالى الصمت
دلوقتى خلاص
أنوار عمدانك بتسرى
وانت اللى معاك حلمى وسرى
ورابطنى بالحبل السرى
لفيت فى بلاد الغربة سنين
وأدينى رجعت.. مشتاق للزرع
وريحة الطين وقناية بتملى القلب حنين
والضحكة فى وش البنى آدمين
بتطمن كل خلايا الروح
أهلك حوالينك فين ماتروح
بتقولك إن الدنيا بخير
وقلوب بتجود من تفكير من غير تكليف
تحت الجميزة فى عز الصيف
لو حتة نعمة فى نص رغيف
ولا تعرف مين صاحب المطرح
ولا مين الضيف
جميز متختن ربانى أطعم م الشهد الحيانى
بتنز حلاوته على لسانى
لو بس لمحته خيال أو طيف
قوللى الجميزة دى راحت فين
طب ليه اتخليت عنها وفرطت
ليه فرطت.. مغلوب على أمرك زى الناس
بتوصل فيهم وتعليهم.. وبتنداس
من كتر ما غدرم بيك
اندفنت فيك كل خلايا الإحساس
كل اللى زرعت الورد عشانهم غشوك
قطفوه.. وسابولك حبة شوك
من خيرك لحم أكتافهم
وأول ما أسنانهم شقت.. نهشوك.