محمد سامى يكتب: مكان بعيد

هو مفيش مكان بعيد يا حبيبتى يجمعنا

مش بس بُعد المسافة إنما أبعد من المعنى

كل أما أصرخ من لذة البص لعيونك

كل اللى فيه يسمعنا من غير ما يسمعنا

مكان يكون الورد فيه مختلف

والحب فيه مختلف

مكان يليق بحضنك المحترف

وبحسنك النادر معرفش ليه دلوقتى مش قادر

أخدك ونتمشى فى عيون الناس

ونبقى صورة من شوقهم الهادى

طب هما يعنى معذورين.. حبهم عادى

لكن إنتى منسوجة بأول خيوط الفجر

وعنيكى واصلة لحد آخر مدى

ومش بعيد الحب لما ابتدى

كنتى إنتى رامية بذرته فى الأرض

إيه اللى خلانا نقابل بعض

وازاى بشوقك اللى قد الدنيا

وكمان بشوقى اللى قد الدنيا

الدنيا هتساعنا

لازم مكان بعيد يا حبيبتى يجمعنا.