مجدى المناديلى يكتب: فض اشتباك بين العصافير والشجر

كشف

سدرى انفتح للكون

لا حليت الستاير ولا نفضت التراب

عمرى ارتبط برصيف وسكة حديد 

وشلة مش أصحاب 

عمرى انسرق 

ومفيش جديد ع الباب.

شبابيك

قابلينى مرة من ورا زحمة عيون الخلق

قابلينى مرة ف شارعك الفاضى

وف ركن هادى

نجرى.. ونضحك.. ونلعب.. 

لو على الفاضى 

قابلينى لو فى خيال.. 

أو حتى فى الماضى. 

زقزقة

مش كتير ع الطير الزقزقة بروقان

طول ما أنت فوق يا طير

قادر على الطيران.. 

لكنما احنا ع الأرض مش قادرين

ع الزيف.. وع البهتان

لا بنملك الزقزقة/ ولا نملك الطيران

أنا بأحسدك يا طير

قادر على ال.. ز.. و.. غ.. ان.

حلم

عشان ما أحلم

لا بد من ركن أحلم فيه

لا بد من قلب.. ألتقيه

لا بد من راحة. 

وبصراحة..

طول عمرى بأحلم بالسفر

ولفين.. 

مش مهم الوطن.. مع مين 

مع أى فرد من البشر.. 

يا هلترى.. 

محتاج أنا فى الحلم لجواز السفر.

مطر

لوّْ تسمحى.. 

ممكن أزورك فى الشتا

قبل السفر 

وأغسل شوارعك م الهموم

وأعرق.. وأجوع

وأرمى بدالك ده النهار اللى انتحر

ما بتسمحيش من المطر

مش مهم.. المهم.. 

أرسم ملامحك جوه قلبك

حين ما يشتد الخطر.