حسن المنطاوى يكتب: قول يا وطن

باعشق ترابك يا وطن

بتزيد حلاوتك لمّا بتزيد المحن

زى ما تكون بترضع بؤسها 

أو بتصهرها وتصنع منها.. 

رمل الشواطئ وجبال شوامخ 

وبيوت مقابر.. وأحيانًا سكن

وبتترسم تقاطيع جمالك

من تجاعيد الزمن

رغم انتصار الليل 

وكُتر الويل وأنواع الفتن

عطرك يفوح.. 

ويرد روح المطحونين جوّه المكَن

وتلم لحم المفضوحين والسكرانين 

واللى من خوفوهم 

بيطل من جوفهم.. عـفــن

وتكفكف الدمع اللى سال 

فوق الخدود حُزن وشجن 

وأنت الأمين على سرّهم 

وطول حياتك مؤتمن

كل دول بيناموا فيك 

يتغطوا بيك 

وبيبيعوك من غير تمن

عايشين فى خيرك 

وبينسبوا فضلك لغيرك 

ويذموا فيك.. وبتتلعن

بس إنت عمرك ما انحنيت 

ولا يوم بكيت 

ولا كنت يوم أبدًا تئـن

فاتح كنوزك للجميع 

واللى يتجدعن يبيع.. ســر وعـلـن

وأنتَ بتضحك منّهم 

وفاتح لهم مليون كفن

واللِّى خدوه هايرجعوه.. 

بالخردلة وهايتوزن 

وانا لمـَّا أموت.. ساعة سكوت 

وبين ضلوعك اندفن

يكفينى بس تلمنى وتضمنى 

وتقول دا واحد عاش..

ومات بيحبنى 

ولا يوم طلب منى التمن.