مختار عبدالفتاح يكتب: ريحة البدايات
الليل جدوره بتستخبى ف السراديب
والحلم شاهد قبر
والشوق غريب
والنور فراشة تايهة ف الملكوت
حاسس كأنى باموت
وأهرب من الجسد المسجى.. فى البياض
وألمس تفاصيل الشفق
وأغنى للطوفان
(على توبك الفضفاض
رسمت حلمى الغبى
الحزن عدى وفاض
كسر بخاطر الصبى)
الشوق بدن.. مجروح على الطرقات
بينادى جنة عدن
ويدق ع الباب الخشب
ترفرف الروح الوحيدة
تمارس طقوس القيام
من غير سبب
يطلع نبات الضل م الشبابيك
يعزف مقام الصمت والانبهار والتجلى
مين اللى حزنه وصللى
خلانى خفت من حضنك الدافى
وكتبت فيكى الشعر
وشهدت مع القوافى
للفارس المأسور ف ساحة الإنشاد
صاده شعاع النور
وضوَّعْ الوردات
من ريحة البدايات.
