طارق أبوجبل يكتب: أنت الجانى
واستنيتك ترجع تانى
يمكن.. جايز كنت أنا بحلم
بس اتصور..
حتى ف حلمى طلعت أنانى
شفتك شارد وسط همومك
شفت دموعك مش نسيانى
ياما ضحكنا كتير أنا وأنت
وياما بكينا
ياما غرقت ف بحر آلامك
وأنت غرقت ف بحر حنانى
واستنيتك ترجع تانى
أنا مش هنكر إنى عشانك
كانت ليا آمال وأمانى
أتمنيتك أسعد واحد
وأنى أشوفك إنسان تانى
كنت أنا بفرح.. لما تنادى عليا بـ اسمى
واما تنادى أقولك.. تانى
تضحك.. وأسمع ضحك عيونك
أصل عيونك بيتى.. مكانى
إوعا تصدق إنى بقلبك كنت هضحى
وإنى أخونك ولا أسيبك لحظة تعانى
إستنيتك لجل أقولك
عمرى ما كنت فى حقك مذنب..
أنت المذنب وأنت الجانى.
